«Ուժեղ Հայաստան»-ի թեկնածուի պաշտպանական կողմը կպահանջի դատավորի ինքնաբացարկ

ՀՀ վարչապետի պաշտոնի համար «Ուժեղ Հայաստան» դաշինքի թեկնածու Սամվել Կարապետյանի գործով Հակակոռուպցիոն դատարանի հաջորդ նիստին պաշտպանական կողմը կներկայացնի միջնորդություն դատավոր Վահե Դոլմազյանի ինքնաբացարկի մասին։

Այս մասին լրագրողներին տեղեկացրեց փաստաբան Արամ Վարդևանյանը՝ նշելով, որ միջնորդության հիմքերը կազմում են նախորդ նիստերի ընթացքում կայացված որոշումները։ Դրանք ներառում են ինչպես Սամվել Կարապետյանին հոր շիրիմին այցելելու հնարավորություն չտրամադրելը, այնպես էլ այսօրվա դատական նիստի ընթացքում կայացված որոշումները։

Վարդևանյանը նաև ընդգծեց, որ, ի տարբերություն նախընտրական քարոզարշավին մասնակցող այլ քաղաքական ուժերի առաջնորդների, տնային կալանքի տակ գտնվող Սամվել Կարապետյանը զրկված է ընտրողների հետ հանդիպելու և իր քաղաքական ծրագիրը ներկայացնելու հնարավորությունից։ Փաստաբանը դա որակում է որպես քաղաքական իրավունքների հավասարության սկզբունքի խախտում, որի ակնհայտ ապացույցն է Կարապետյանի խափանման միջոցը փոխելու դատարանի անընդհատ մերժումը։

Հիշեցնենք, որ Սամվել Կարապետյանի գործով հաջորդ դատական նիստը նախատեսված է մայիսի 26-ին՝ ժամը 14:30-ին։ Նիստի ընթացքում կշարունակվի ներկայացված միջնորդության քննարկումը։

Ավելի վաղ ՀՀ վարչապետ Նիկոլ Փաշինյանը հայտարարել էր, որ Հայաստանի օրենսդրության և սահմանադրության համաձայն, երկու կամ ավելի երկրի քաղաքացիություն ունեցող անձինք չեն կարող զբաղեցնել պատգամավորի կամ վարչապետի պաշտոնը։ Ի պատասխան այդ հայտարարության՝ ապրիլի 15-ին Կարապետյանը հայտնել էր, որ սկսել է Ռուսաստանի և Կիպրոսի քաղաքացիությունից հրաժարվելու գործընթացը։