Իրաքում հանդիսավորությամբ վերաբացվեց հայկական հինգերորդ եկեղեցին Ռաֆիկ Կիրակոսյան, December 23, 2025 Իրաքի մայրաքաղաք Բաղդադում տեղի ունեցավ Առաջնորդանիստ Սուրբ Գրիգոր Լուսավորիչ Մայր եկեղեցու վերաբացման հանդիսավոր արարողությունը։ Եկեղեցին, որը կառուցվել էր 1957 թվականին, իր դռները բացեց հավատացյալների առջև՝ նշելով շուրջ մեկ տարի տևած հիմնանորոգման ավարտը։ Այս կարևոր իրադարձությունը տեղի ունեցավ Ամենայն Հայոց Գարեգին Բ կաթողիկոսի հայրապետական օրհնությամբ և Իրաքի Հայոց թեմի առաջնորդ Տեր Օշական եպիսկոպոս Գյուլգյուլյանի ղեկավարությամբ։ Հանդիսավորությանը ներկա էին Իրաքի վարչապետ Մոհամմեդ Շիա Սուդանինը, պետական այրեր, քաղաքական գործիչներ, Իրաքում ներկայացված քրիստոնեական եկեղեցիների պետերը, ինչպես նաև Իրաքում հավատարմագրված մի շարք երկրների դեսպաններ։ Արարողության ընթացքում հոգևոր թափորը տեղափոխվեց եկեղեցի, որտեղ եկեղեցիների պետերի մասնակցությամբ կատարվեց միասնաբար աղոթք։ Օրվա հոգևոր մթնոլորտը առավել շքեղ դարձրեցին Սուրբ Գրիգոր Լուսավորիչ եկեղեցու «Զվարթնոց» երգչախմբի հոգեպարար կատարումները։ Շնորհակալական խոսքեր հնչեցին Կենտրոնական վարչության ատենապետ Կարապետ Գալուստյանի և Քրիստոնեական նախարար Դոկտոր Ռամի Աղաջանի կողմից։ Տեր Օշական եպիսկոպոս Գյուլգյուլյանը շնորհակալություն հայտեց Իրաքի կառավարությանը՝ նշելով, որ նրա նյութական օժանդակության շնորհիվ հնարավոր դարձավ այս մեծածավալ աշխատանքի իրականացումը։ Վարչապետ Մոհամմեդ Շիա Սուդանինը իր հերթին շեշտեց քրիստոնյաների և մուսուլմանների եղբայրական համակեցության կարևորությունը՝ ընդգծելով, որ Իրաքի իշխանությունները մեծապես կարևորում են հայ ժողովրդի ներկայությունը և հոգևոր կյանքի զարգացումը երկրում։ Արարողությունը եզրափակվեց հուշագրերի և նվերների փոխանակմամբ։ Նույն օրը, Ն.Ս.Օ.Տ.Տ. Գարեգին Բ Ամենայն Հայոց Կաթողիկոսի օրհնությամբ, Տեր Սեպուհ քահանա Բաղդասարյանը արժանացավ քահանայական լանջախաչ կրելու պատվին՝ ի նշան իր նվիրյալ ծառայության և եկեղեցասիրության։ Միջազգային