Եվրախորհրդարանը կքննարկի Հայաստանի ընտրություններին արտաքին միջամտության դեմ պայքարի աջակցության բանաձևը

Եվրոպական խորհրդարանում (ԵԽԽ) ապրիլի 27-30-ի ընթացքում կկայանան քննարկումներ, որոնք նպատակ ունեն աջակցություն ցուցաբերել Հայաստանին՝ երկրում հունիսի խորհրդարանական ընտրություններին ընդառաջ արտաքին միջամտության դեմ պայքարում։ Այս մասին հայտնում է Եվրախորհրդարանի մամուլի ծառայությունը։

Քննարկումները կկայանան երկու փուլով։ Ապրիլի 28-ին Եվրոպական հանձնաժողովի և ԵՄ Խորհրդի ներկայացուցիչների հետ լիագումար քննարկումների ընթացքում, ինչպես նաև ապրիլի 30-ին ընդունվելիք ուղեկցող բանաձևում, Եվրախորհրդարանի պատգամավորները կընդգծեն արտաքին միջամտությունից զերծ, ժողովրդավարական և անվտանգ քվեարկության անհրաժեշտությունը։ Նրանք կհայտնեն իրենց մտահոգությունը Մոսկվայի կողմից իրականացվող փորձերի առնչությամբ՝ ապատեղեկատվություն տարածելու և քվեարկության արդյունքների վրա ազդելու նպատակով։

Բացի այդ, Եվրախորհրդարանը կոչ կանի ակտիվացնել ջանքերը Հայաստանի ընդհանուր ժողովրդավարական կայունության ամրապնդման ուղղությամբ։

Այս քայլը կատարվում է այն պայմաններում, երբ ԵՄ-ն վերջերս գործարկել է նոր քաղաքացիական առաքելություն՝ աջակցելու Հայաստանի իշխանություններին կարողությունների զարգացման և բազմամակարդակ սպառնալիքներին հակազդման գործում։ Այս սպառնալիքներից են արտաքին տեղեկատվական մանիպուլյացիան և միջամտությունը (FIMI), կիբերհարձակումները և անօրինական ֆինանսական հոսքերը։

Հիշեցնենք, որ ԵՄ արտաքին գործերի նախարարների խորհուրդը ապրիլի 21-ին հավանություն է տվել երկու տարի ժամկետով Հայաստան ուղարկվող նոր քաղաքացիական առաքելությանը։ Առաքելության խնդիրն է ամրապնդել Հայաստանի դիմադրողականությունը հիբրիդային սպառնալիքների նկատմամբ՝ ռազմավարական և գործնական խորհրդատվություն տրամադրելով նախարարություններին և անվտանգության մարմիններին։ Այս խորհրդատվությունները կկենտրոնանան քաղաքականության մշակման, տեղեկատվության արտաքին մանիպուլյացիաների, կիբեռհարձակումների և անօրինական ֆինանսական հոսքերի բացահայտման և արձագանքման վրա։

Առաքելությունը նաև կգնահատի Հայաստանի անվտանգության ներուժի զարգացման համար անհրաժեշտ միջոցները՝ երկիրը կարողանալու համար առավել արդյունավետ կերպով բացահայտել և արձագանքել հիբրիդային սպառնալիքներին՝ ԵՄ մեթոդաբանություններին և չափանիշներին համապատասխան։