Աթենքում տեղի է ունեցել Հայոց ցեղասպանության 111-րդ տարելիցին նվիրված միջոցառում Սերոբ Աբրահամյան, May 11, 2026 Աթենքի քաղաքապետարանում տեղի է ունեցել Հայոց ցեղասպանության 111-րդ տարելիցին նվիրված միջոցառում։ Այս արարողությունը կազմակերպվել է Հունաստանի հայերի միության կողմից՝ համագործակցելով Աթենքի քաղաքապետարանի հետ։ «Ժողովուրդը հաղթում է մահին» խորագրով միջոցառմանը ներկայացել են Աթենքի քաղաքապետարանի ներկայացուցիչներ, Աթիկայի շրջանի նահանգապետերի տեղակալներ, ինչպես նաև հունական տարբեր քաղաքական կուսակցությունների ներկայացուցիչներ։ Բացի այդ, ներկա էին Հունաստանում Հայաստանի դեսպանության պատվիրակը և Հունաստանի հայոց թեմի առաջնորդ Խորեն եպիսկոպոս Առաքելյանը։ Երեկոյի ընթացքում հունական լեզվով ասմունքների ուղեկցությամբ կատարվել են հայկական մշակույթը ներկայացնող երգեր և հայ անվանի բանաստեղծների ստեղծագործությունների հատվածներ։ Բացի այդ, ներկայացվել են հայկական ազգային պարեր։ Ազգային հիշողության, դիմադրության և վերածննդի ոգին հայկական մշակույթի միջոցով հանդիսատեսին հաղորդող մշակութային ծրագիրը ներկայացրել են «Մկրտիչ Պողոսյան» ազգագրական երաժշտական համույթի և «Ավետիս» հայ ազգագրական պարախմբի անդամները։ Միջոցառման կազմակերպիչները նշել են, որ նման նախաձեռնությունները մեծ նշանակություն ունեն ոչ միայն պատմական արդարության և ազգային հիշողության պահպանման համար, այլև համայնքային կյանքի կենսունակության և Սփյուռք-Հայաստան կապերի ամրապնդման տեսանկյունից։ Սոցիում