Ֆրանսիայի նախագահը կոչ է արել Իրանին երաշխավորել նավարկության ազատությունը Հորմուզի նեղուցում

Ֆրանսիայի նախագահ Էմանուել Մակրոնը հեռախոսազրույց է անցկացրել Իրանի նախագահ Մասուդ Փեզեշքիանի հետ՝ քննարկելով տարածաշրջանի անվտանգության և միջազգային լարվածության հարցերը։

Զրույցի ընթացքում Ֆրանսիայի նախագահը նախ և առաջ ընդգծել է երկու ֆրանսիացի քաղաքացիների՝ Սեսիլ Կոլերի և Ժակ Պարիի անվտանգությունը և նրանց Ֆրանսիա վերադարձի հարցը։ Քաղաքացիները ներկայումս գտնվում են Ֆրանսիայի դեսպանատանը՝ Իրանում լրտեսության մեղադրանքի կապակցությամբ։

Մակրոնը նաև կոչ է արել Իրանին անհապաղ դադարեցնել տարածաշրջանի երկրներին ուղղված հարվածները և երաշխավորել նավարկության ազատությունը՝ վերջ դնելով Հորմուզի նեղուցի փաստացի փակմանը։ Նա նշել է, որ այս գործողությունը ծանր հարված է հասցնում աշխարհի էներգետիկ շուկաներին։

Ֆրանսիայի նախագահը կրկին արտահայտել է իր խորին մտահոգությունը Իրանի միջուկային և բալիստիկ հրթիռային ծրագրերի զարգացման և տարածաշրջանում դրա ապակայունացնող գործունեության վերաբերյալ։ Նրա կարծիքով՝ ներկայիս ճգնաժամի հիմքում հենց այս հարցերն են։

Մակրոնը նշել է, որ դիվանագիտական լուծումը այս խնդիրները լուծելու, էսկալացիան կանխելու և խաղաղությունը պահպանելու համար առավել քան երբևէ անհրաժեշտ է։ Նախագահները պայմանավորվել են շարունակել կապի մեջ մնալ։

Հիշեցնենք, որ Իրանը փակել է Հորմուզի նեղուցը փետրվարի 28-ին՝ ԱՄՆ-ի և Իսրայելի կողմից իր տարածքում հարձակումներից հետո։ Այս գործողությունը հանգեցրել է նավթի և գազի գների զգալի աճի աշխարհի շուկաներում։