ՀՀ պաշտպանության նախարարը չի բացառում Ռուսաստանից ժամանած զինապարտների զինվորական հավաքների ծանուցումներ ստանալու հնարավորությունը

ՀՀ պաշտպանության նախարար Սուրեն Պապիկյանը լրագրողների հետ զրույցում անդրադարձել է ընտրություններին մասնակցելու համար Ռուսաստանից ժամանած ՀՀ քաղաքացիների հնարավոր զինվորական հավաքների մասին հարցին։

Նախարարը նշել է, որ չի կարող բացառել, որ նրանց կարող է հանձնվել համապատասխան ծանուցագիր։ «Եթե Ռուսաստանից ժամանած և զինապարտ հանդիսացող ՀՀ քաղաքացի իր պարտականությունները Հայրենիքի հանդեպ չի կատարում, ապա ես չեմ կարող դա բացառել», – ասաց նա։

Պապիկյանը վստահեցրել է, որ ուսումնական զինվորական հավաքների մասին ծանուցումները տարածվում են բոլոր զինապարտ քաղաքացիների վրա, անկախ նրանց ծագման երկրից։ Ըստ նրա՝ այդ պահանջը վերաբերում է նաև Ֆրանսիայից կամ ԱՄՆ-ից ժամանած անձանց։

Նախարարը հերքել է այն տեղեկությունները, թե ծանուցագրերը հանձնվում են անմիջապես սահմանային անցակետերում։ «Ծանուցագրերը հանձնելու համար կա սահմանված կարգ։ Ծանուցումը, որպես կանոն, իրականացվում է այդ ընթացակարգին համապատասխան։ Օդանավակայանում ոչ մեկին ծանուցագիր չեն կարող հանձնել», – պարզաբանել է նա։