Փաշինյանը պատրաստում է երրորդ հայցը Սամվել Կարապետյանի դեմ

Հայաստանի վարչապետ Նիկոլ Փաշինյանը հայտարարել է, որ իրենց կողմից պատրաստվում է երրորդ հայցը «Ուժեղ Հայաստան» կուսակցության առաջնորդ Սամվել Կարապետյանի դեմ։

Այս մասին վարչապետը հայտնել է մայիսի 28-ի ճեպազրույցի ընթացքում։ Նրա խոսքով՝ հայցի պատճառը «Արմենիա» հեռուստաընկերությանը տված հարցազրույցի ընթացքում կուսակցության ներկայացուցիչների կողմից արված հայտարարությունն է։

Ըստ այդ հայտարարության՝ Նիկոլ Փաշինյանը իբր հաստատել է 300 հազար ադրբեջանցիների՝ Հայաստան վերաբնակեցման կամ վերադարձի մասին տեղեկությունները։

«Ակնհայտ է, որ Սամվել Կարապետյանը պետք է երրորդ անգամ ներողություն խնդրի։ Եվ եթե նա արդեն սկսել է անհանգստանալ դատական հայցերի կապակցությամբ, նշանակում է՝ նրա վիճակի մասին լուրերը խիստ չափազանցված են»,- նշել է կառավարության ղեկավարը։