Ռոբերտ Քոչարյանը հայտարարել է, որ իշխանությունները չեն ուզում վերադարձնել հայ ռազմագերիներին Ադրբեջանից

Ախուրյանում ընթացող նախընտրական քարոզարշավի ընթացքում «Հայաստան» դաշինքի առաջնորդ, վարչապետի թեկնածու Ռոբերտ Քոչարյանը հայտարարել է, որ Հայաստանի իշխանությունները ոչ միայն չեն զբաղվում, այլև չեն ուզում վերադարձնել ադրբեջանական գերությունից հայ ռազմագերիներին։

Նրա խոսքով՝ դա պայմանավորված է նրանով, որ իշխանությունները վախենում են, որ այդ գերիները, վերադարձնելուց հետո, կարող են դառնալ երկրում հեղինակավոր մարդիկ, որոնք կփորձեն համախմբել արտագաղթած հայերին։

«Ես վստահ եմ, որ Հայաստանի իշխանություններն այդ հարցով չեն զբաղվում։ Նրանց ասելով՝ դա «նուրբ թեմա է, ուստի նրանք չեն հրապարակում այն»։ Սակայն, մայիսի 18-ին Նիկոլ Փաշինյանի արցախցիների հասցեին արած հայտարարությունները վկայում են այլ բան. նրանք ոչ միայն չեն զբաղվում այդ հարցով, այլ նաև ուզում են, որ հայ ռազմագերիները մնան Ադրբեջանում, որպեսզի հեղինակություն ունեցող մարդիկ չհայտնվեն այստեղ և չփորձեն ինչ-որ նպատակների համար համախմբել արտագաղթած մարդկանց», – ասել է Քոչարյանը։

Նա խայտառակ է համարել այն փաստը, որ այդ հարցը չի բարձրացվել անգամ Վաշինգտոնում համատեղ «խաղաղության մասին հռչակագրի» ստորագրման շրջանակներում, որը, նրա կարծիքով, իրականում ոչ մի ընդհանուր բան չունի խաղաղության հետ։ «Նրանք պետք է այդ հարցը դնեին որպես նախապայման։ Չեմ կասկածում, որ դրա համար բոլոր հնարավորությունները կային։ Քանի որ Ադրբեջանի նախագահ Իլհամ Ալիևն արդեն քաղել է բոլոր օգուտները դրանից», – նշել է նա։

«Հայաստան» դաշինքի առաջնորդը միաժամանակ վստահեցրել է, որ հայ ռազմագերիների վերադարձի հարցը լինելու է Ադրբեջանի հետ բանակցային գործընթացներում իրենց պայմաններից մեկը։ «Ես միշտ եղել եմ խոսքի մարդ։ Չեմ կարող ասել, թե որքան ժամանակ կպահանջվի։ Բայց ես հավաստիացնում եմ, որ այդ հարցը կարող է լուծվել ողջամիտ ժամկետում, ես տեսնում եմ նման հնարավորություններ։ Մինչդեռ, Հայաստանի իշխանությունները շատ բան են տվել՝ փոխարենը ոչինչ չստանալով», – եզրափակել է Քոչարյանը։

Հիշեցնենք, որ ադրբեջանական բանտերում պահվող հայ ռազմագերիների և պատանդների ստույգ թիվը մինչ օրս հայտնի չէ։ Փորձագետների գնահատմամբ՝ նրանք մի քանի հարյուր են։ Ադրբեջանի իշխանությունները հաստատում են իրենց մոտ 19 հայերի առկայությունը։ Այդ թվում են նաև Արցախի ռազմաքաղաքական ղեկավարության նախկին և գործող 8 ներկայացուցիչներ՝ Արկադի Ղուկասյանը, Բակո Սահակյանը, Արայիկ Հարությունյանը, արտաքին գործերի նախարար Դավիթ Բաբայանը, խորհրդարանի խոսնակ Դավիթ Իշխանյանը, Պաշտպանության բանակի նախկին հրամանատար Լևոն Մնացականյանը, գեներալ Դավիթ Մանուկյանը և նախկին պետնախարար Ռուբեն Վարդանյանը։

Բաքվի խամաճիկային դատարանը շինծու մեղադրանքներով ցմահ ազատազրկման է դատապարտել Արայիկ Հարությունյանին, Դավիթ Բաբայանին, Դավիթ Իշխանյանին, Դավիթ Մանուկյանին, Լևոն Մնացականյանին, իսկ Բակո Սահակյանին և Արկադի Ղուկասյանին և Ռուբեն Վարդանյանին՝ 20 տարվա ազատազրկման։ Մնացած արցախցիներին՝ մինչև 15 տարվա ազատազրկման։