Կանզասի Ազգային գվարդիան և հայ խաղաղապահները համատեղ պլանավորման վարժություններ են անցկացրել

Հայաստանում ԱՄՆ դեսպանատան հաղորդագրության համաձայն՝ Կանզասի Ազգային գվարդիայի ներկայացուցիչները հայ խաղաղապահների հետ համատեղ մասնակցել են երկկողմանի միջոցառման։ Այս միջոցառման ընթացքում քննարկվել են գործողությունների պլանավորման, առաջնորդության կատարելագործման և խաղաղապահ գործողություններին պատրաստվածության հարցերը։

Այս նախաձեռնությունը նպատակ ունի զարգացնելու Հայաստանի խաղաղապահ բրիգադի 2-րդ գումարտակի կարողությունները՝ արհեստավարժության բարձրացման և միջազգային խաղաղապահ գործառույթների նախապատրաստման շարունակական աշխատանքների շրջանակում։ Կանզասի ազգային գվարդիայի անձնակազմը ներկայացրել է խաղաղապահ գործողություններում կիրառվող ռազմական պլանավորման գործընթացների, հրամանատարական տարբեր օղակներում համակարգման և բուժօգնության պլանավորման լավագույն փորձը։

Համագործակցությունը, որը սկսվել է 2003 թվականին՝ Նահանգային գործընկերության ծրագրի շրջանակում, ընդգծում է երկարամյա կապը Հայաստանի և Կանզաս նահանգի միջև՝ մարտական պատրաստության, պատրաստվածության և արհեստավարժ զինվորական ծառայության կատարելագործման ոլորտներում։