ՀՀ արտաքին գործերի նախարարը և Բելգիայի նախարարը բարձր են գնահատել երկկողմանի քաղաքական երկխոսությունը

Ապրիլի 20-ին կայացած հեռախոսազրույցի ընթացքում Հայաստանի արտաքին գործերի նախարար Արարատ Միրզոյանը և Բելգիայի փոխվարչապետ, արտաքին գործերի, եվրոպական հարցերի և արտաքին առևտրի նախարար Մաքսիմ Պրևոն բարձր են գնահատել երկու երկրների միջև ակտիվ քաղաքական երկխոսությունը։

Զրույցի ընթացքում կողմերը ընդգծել են երկկողմանի և ԵՄ շրջանակներում համագործակցության հետագա խորացման կարևորությունը։ Հեռախոսազրույցի հիմնական թեման մայիսին Երևանում կայանալիք Եվրոպական քաղաքական համայնքի և Հայաստան-ԵՄ գագաթնաժողովների օրակարգն էր։

Կողմերը մանրամասն քննարկել են ժողովների օրակարգի հիմնական հարցերը, այդ թվում՝ ժողովրդավարական դիմադրողականության ամրապնդման և երկու երկրների միջև տնտեսական կապերի ընդլայնման հնարավորությունները։

Տարածաշրջանային զարգացումների վերաբերյալ նախարարները փոխանակվել են մտքեր Հարավային Կովկասում ի հայտ եկող նոր իրողությունների շուրջ։ Հայաստանի և Ադրբեջանի միջև հաստատված խաղաղության համատեքստում ընդգծվել է կապի և ենթակառուցվածքների զարգացման նախագծերի առաջխաղացման կարևորությունը՝ որպես տարածաշրջանի խաղաղության և կայունության հիմնաքար։

Բացի այդ, Միրզոյանը և Պրևոն քննարկել են նաև փոխադարձ հետաքրքրություն ներկայացնող այլ հարցեր։