18-ամյա պատանիին մեղադրել են խուլիգանության՝ վարչապետի մեքենայի վրա թքելու համար Մարգար Տեր-Գրիգորյան, March 31, 2026 Հայաստանում 18-ամյա Միքայել անունով պատանուն մեղադրել են խուլիգանության հոդվածով՝ այն բանի համար, որ նա թքել է վարչապետ Նիկոլ Փաշինյանի ծառայողական մեքենայի վրա։ Այս մասին հաղորդել է փաստաբան Ռուբեն Մելիքյանը՝ իր Facebook-ի էջում ուղիղ եթերով։ Դեպքը տեղի է ունեցել մարտի 29-ին՝ Սուրբ Աննա եկեղեցում տեղի ունեցած միջադեպից անմիջապես հետո, Ծաղկազարդի օրը։ Ըստ փաստաբանի՝ պատանին աղբ էր հանում, երբ տեսել է վարչապետի ավտոշարասյունը։ Նա մոտեցել է և թքել է հենց Փաշինյանին սպասարկող մեքենայի վրա։ Թե ինչու է դա արել, նրանից հարցնելուց հետո երիտասարդը պատասխանել է․ «Որովհետև թուրքը վաճառել է մեր հողերը»։ Փաստաբանը նշել է, որ այս պահին մեքենան ոչ թե պետական, այլ քաղաքական գործառույթ էր կատարում, և վարչապետը ծառայողական մեքենան օգտագործում էր իր կուսակցական նպատակներով։ Դեպքից հետո երիտասարդին ձերբակալել են 48 ժամով և ներկայացրել դատախազի որոշումը, համաձայն որի՝ նրա արարքը ենթակա է խուլիգանության հոդվածի։ Նրա նկատմամբ կիրառվել է խափանման միջոց՝ ստորագրություն չհեռանալու մասին։ Իրավիճակի առնչությամբ Ռուբեն Մելիքյանը հիշեցրել է նաև այն դեպքը, երբ ԱԺ նախագահ Ալեն Սիմոնյանը թքել էր իրեն «դավաճան» անվանած քաղաքացու դեմքին։ Այդ դեպքում նրան մեղադրանք չէր առաջադրվել։ «Ստացվում է, որ Ալեն Սիմոնյանը կարող է թքել քաղաքացու երեսին, դա պատժելի չէ և քննչական մարմնի կողմից հանցագործություն չի որակվում, իսկ պատանին, ով պարզապես անքաղաքավարի ձևով որոշել է իր քաղաքական դիրքորոշումը դրսևորել, ստացվում է, հանցագործություն է կատարել։ Սա ակնհայտ խտրական մոտեցում է, ավելին, պատանին 48 ժամով ձերբակալվել է։ Ըստ էության, այսօր Հայաստանում երեխաներին ցույց է տրվում, որ երկրում իրավունք չի գործում», – եզրափակել է փաստաբանը։ Քաղաքական